سیمانچل میں تعلیمی انقلاب لانے کے لئے معروف ماہر تعلیم محترم مبارک کاپڑی علاقۂ سیمانچل میں تعلیمی انقلاب لانے اور آپ کے بچوں کی تقدیر جگمگانے کے لیے 20 نومبر سے 23 نومبر تک سیمانچل میں اپنا تعلیمی پیغام لے کر مختلف علاقوں کا دورہ کیا اور تقریریں کیں
کشن گنج: تعلیم اور سماجی بیداری پر کام کرنے والی تنظیم نصیریہ فاؤنڈیشن نے بہار کے ضلع کشن گنج کے انتہائی پسماندہ علاقہ کے ایک قصبہ پناسی (کشن گنج، بہار) میں 22 نومبر 2022 بروز منگل ایک تعلیمی کیمپ منعقد کیا۔ یہ تعلیمی کیمپ جناب اخترالایمان ریاستی صدر مجلس اتحاد المسلمین بہار و رکن اسمبلی بہار کے زیر صدارت سہ روزہ سیمانچل انقلابی تعلیمی کانفرنس کا حصہ تھا۔
واضح رہے کہ سیمانچل میں تعلیمی انقلاب لانے کے لئے معروف ماہر تعلیم محترم مبارک کاپڑی (ممبئی) علاقۂ سیمانچل میں تعلیمی انقلاب لانے اور آپ کے بچوں کی تقدیر جگمگانے کے لیے 20 نومبر سے 23 نومبر تک سیمانچل میں اپنا تعلیمی پیغام لے کر مختلف علاقوں کا دورہ کیا اور تقریریں کیں۔
تعلیمی مجلس کا آغاز آکسفورڈ انٹرنیشنل کشن گنج کے جناب تفہیم الرحمن صاحب نے اپنے تعارفی بیان سے کیا پھر اس کے بعد جناب قاری عیسی برکاتی نے تلاوت قرآن مجید کی اور مہمانوں کو گلدستے پیش کئے گئے۔
ترقی اور کامیابی کے لئے بنیادی چیز تعلیم
اس مہم میں جن اہم مسئلوں پر بحث کی گئی ان میں سے اہم بات ممبئی سے تشریف لائے ہوئے اہم مقرر جناب مبارک کاپڑی نے باور کرانے کی کوشش کی کہ کسی بھی شخص کسی بھی ملت یا کسی بھی ملک کی ترقی اور کامیابی کے لئے بنیادی چیز تعلیم ہے۔ جس میں جتنی زیادہ تعلیم ہوگی وہ اتنا ہی ترقی یافتہ اور سر بلند ہوگا۔
جناب اختر الایمان صاحب نے کہا کہ بہت افسوس کا مقام یہ ہے کہ سیمانچل کے بچے ملک کی سبھی ریاستوں سے تعلیمی میدان میں بہت پیچھے ہیں۔ اسی لیے ہمارا سیمانچل بھی تعلیمی معاشی سماجی اور سیاسی ہر اعتبار سے پیچھے ہے۔ آج کے زمانے میں ساری ترقی اور عزت کا انحصار تعلیم اور صرف تعلیم پر ہے۔ لہذا ہم نے اپنے بچوں کو بہتر سے بہتر تعلیم دیں۔ انہیں پڑھا لکھا کر ٹیچر، پروفیسر آفیسر، قانون دان اور جج بنائیں اور سیمانچل کو ملک کا سب سے ترقی یافتہ خطہ بنائیں۔
مغربی بنگال سے سیاسی کارکن جناب جاوید اختر اور جناب ڈاکٹر صادق الاسلام نے بھی اپنی اپنی تقریروں میں تعلیم کی اہمیت پر زور دیتے ہوئے کہا کہ سیمانچل میں تعلیم زبوں حالی ایک بہت اہم مسئلہ ہے جس کے سد باب کے لیے جگہ بہ جگہ اور وقتا فوقتا ایسے مہموں کی ضرورت ہے۔
مقرر خصوصی جناب مبارک کاپڑی صاحب کی تقریر کے بعد حاضرین طلباء نے کریئر سے متعلق اپنے سوالات کئے جن کا کاپڑی صاحب نے جواب دیا۔
مجلس کا اہتمام مدرسے میں ہونے کی وجہ سے مدرسہ کے طلباء نے بھی عالمیت اور فضلیت کے بعد کریئر آپشنز پر سوالات کئے۔
نصیریہ فاؤنڈیشن کی خدمات
نصیریہ فاؤنڈیشن کے ڈائرکٹر ڈاکٹر جلیس اختر نصیری نے اپنی نظامت کے دوران کہا کہ سائنس، آرٹس اور ہیومنٹیز جیسے تعلیمی شعبوں کی مختلف اہمیتیں ہیں اور کسی بھی فیلڈ میں مہارت کامیابی کا ضامن ہوسکتی ہے۔
انہوں نے کہا کہ نصیریہ فاؤنڈیشن ایک ٹرسٹ ہے جو ایجوکیشن، ہیلتھ اور سماجی بیداری پر کئی سالوں سے کام کرتا آیا ہے۔ فاؤنڈیشن کے تحت مسجد، مدرسہ، خانقاہ کے علاوہ این سی پی یو ایل کے بھی کئی تعلیمی و ٹریننگ کورسیس چلائے جاتے ہیں اور گزشتہ کئی سالوں میں سینکڑوں غریب سٹوڈینس کو کمپیوٹر سیوی بنانے کا کام کیا ہے۔
