بہار کی تمام دینی ملی جماعتوں اور اہم ملی شخصیات نے وزیراعلیٰ نتیش کمار سے ریاست کی عبادت گاہوں کو کھولنے کی اپیل کی ہے۔ ملی جماعتوں کے ذمہ داران نے حکومت کی کوششوں سے کورونا کی روز بروز گھٹتی تعداد پر اطمینان کا اظہار کیا اور کہا کہ ایسے میں عبادت گاہوں کو اب چند شرائط کے ساتھ کھولنے کا حکومت کو فوری فیصلہ کرنا چاہئے۔
پٹنہ: بہار کی تمام دینی ملی جماعتوں اور اہم ملی شخصیات نے وزیراعلیٰ نتیش کمار سے ریاست کی عبادت گاہوں کو کھولنے کی اپیل کی ہے۔ منگل کو جاری ایک بیان میں ملی جماعتوں کے ذمہ داروں نے کورونا سے متعلق حکومت کے موجودہ گائڈ لائن پر اظہار خیال کرتے ہوئے کہا کہ سرکاری و غیر سرکاری دفاتراور دکانوں کو معمولی شرائط کے ساتھ کھولنے کی اجازت دی گئی ہے۔ یہاں تک کہ پارکوں کو بھی کھولنے کی اجازت دی گئی ہے۔ لیکن مندر، مسجد، گرجاگھر اور گردوارہ کو بند کرنے کو کہا گیا ہے۔
ملی جماعتوں کے ذمہ داران نے کہا کہ کورونا جیسی مہلک وبا پر قابو پانے کے لئے حکومت نے جو احتیاطی اقدام اٹھائے ہیں، ان کی وہ تائید اور ستائش کرتے ہیں اور وزیر اعلیٰ بہار کی فکر مندی پر غیر معمولی اطمینان کا اظہار کرتے ہیں۔ یقینا حفظ ما تقدم کے طور پر یہ تدابیر شہریوں کے لئے مفید اور ضروری ہیں۔ تاہم عبادت گاہوں کو بالکل ہی بند کرکے رکھنا مناسب نہیں معلوم ہوتا۔ انہوں نے حکومت کی کوششوں سے کورونا کی روز بروز گھٹتی تعداد پر اطمینان کا اظہار کیا اور کہا کہ ایسے میں عبادت گاہوں کو اب چند شرائط کے ساتھ کھولنے کا حکومت کو فوری فیصلہ کرنا چاہئے۔
بیان جاری کرنے والے دینی ملی اہم شخصیات
بیان جاری کرنے والوں میں امارت شرعیہ کے نائب امیر شریعت مولانا شمشاد رحمانی، خانقاہ منعمیہ قمریہ، میتن گھاٹ کے سجادہ نشیں مولانا سید شمیم الدین احمد منعمی، جمعیت علماء ہند بہار کے قائم مقام جنرل سکریٹری مولانا سید شاہ مشہود احمد قادری ندوی، مرکزی ادارہ شرعیہ بہار کے مہتمم مولانا سید احمد رضائی، صوبائی جمعیت اہل حدیث بہار کے نائب امیر مولانا خورشید مدنی، امارت شرعیہ کے قائم مقام ناظم مولانا شبلی القاسمی، جمعیت العلماء ہند، بہار کے ناظم مولانا محمد ناظم، جماعت اسلامی ہند، بہار کے امیر حلقہ مولانا رضوان احمد اصلاحی، جنرل سکریٹری مجلس علماء و خطباء امامیہ کے جنرل سکریٹری مولانا سید امانت حسین اور آل انڈیا مسلم مجلس مشاورت (بہار چیپٹر) کے سکریٹری جنرل ڈاکٹر انوارالہدیٰ شامل ہیں۔
