مرکزی وزیر داخلہ امت شاہ نے آج ایک بار پھر اس عزم کو دہرایا ہے کہ 2 مئی کو مغربی بنگال کے لئے ایک نئی صبح کا آغاز ہوگا اور سونار بنگلہ کی تعمیر کا آغاز ہوگا۔ امت شاہ نے ایک بار پھر این آر سی کے نفاذ کا اشارہ دیتے ہوئے کہا کہ ملک سے دراندازوں کو بھگانے کے لئے این آر سی بھی نافذ کیا جاسکتا ہے۔
کلکتہ: مرکزی وزیر داخلہ امت شاہ نے آج ایک بار پھر اس عزم کو دہرایا ہے کہ 2 مئی کو مغربی بنگال کے لئے ایک نئی صبح کا آغاز ہوگا اور سونار بنگلہ کی تعمیر کا آغاز ہوگا۔ امت شاہ نے ایک بار پھر این آر سی کے نفاذ کا اشارہ دیتے ہوئے کہا کہ ملک سے دراندازوں کو بھگانے کے لئے این آر سی بھی نافذ کیا جاسکتا ہے۔ خیال رہے کہ اس سے قبل امت شاہ اور بی جے پی کے دیگر لیڈروں نے واضح لفظوں میں کہا تھا کہ اس وقت این آر سی کے نفاذ کا کوئی ارادہ نہیں ہے۔
راہل گاندھی کو سیاح قرار دیتے ہوئے امت شاہ نے کہا کہ بنگال میں وہ گھومنے کے لئے آتے ہیں۔ بنگال میں کئی مراحل کی پولنگ ہو چکی ہے مگر راہل بابا نظر نہیں آ رہے ہیں ۔ایک ریلی سے خطاب کرکے این ڈی اے کی تنقید کی ہے۔ انہیں معلوم نہیں ہے کہ این ڈی اے قوم پرستی میں یقین رکھتی ہے اور ہندوستان کو خود انحصاری کی طرف لے جارہی ہے۔
دراندازی کے معاملے پر شاہ نے کہا کہ درانداز ہمارے نوجوانوں کی ملازمتیں اور غریبوں کا کھانا چھین رہے ہیں۔ اگر بنگال میں دراندازی پر قابو نہ پایا گیا تو یہ نہ صرف بنگال بلکہ پورے ملک کے لئے خطرہ ہوگا۔ انہوں نے شہریت کے معاملے پر ریاست کی وزیر اعلی ممتا بنرجی کی تنقید کرتے ہوئے کہا کہ ممتا بنرجی نہیں چاہتی ہیں کہ متوا اور دیگر قبائلیوں کو شہریت نہیں ملنی چاہیے۔
بی جے پی کے اقتدار میں آتے ہی شہریت ترمیمی ایکٹ کو نافذ کیا جائے گا
انہوں نے کہا کہ ہم اقتدار میں آتے ہی شہریت ترمیمی ایکٹ کو نافذ کیا جائے گا۔ انہوں نے کہا کہ بنگال میں 70 سال سے لوگ مقیم ہیں اور انہیں ہندوستانی شہریت نہیں ملی ہے۔ وہ مہاجر کے طور پر زندگی گزار رہے ہیں۔ انہوں نے کہا کہ ہم ایسے لوگوں کو ہندوستانی ہونے کی شناخت دینے کے ساتھ ساتھ ان کی باز آباد کاری کے لئے بھی فنڈ مختص کیا ہے۔
امت شاہ نے کہا کہ بی جے پی بنگال میں 200 سے زائد سیٹوں پر کامیابی حاصل کرے گی اور حکومت بنائے گی۔