مرکزی وزیر تعلیم رمیش پوکھریال نشنک ہندوستانی سفیر ترنجیت سنگھ سندھو سے ملاقات کر کے امریکہ کے مختلف اعلی تعلیمی اداروں میں اس کے فروغ میں ان سے تعاون کی خواہش کی۔
نئی دہلی: مرکزی وزیر تعلیم رمیش پوکھریال نشنک نے منگل کے روز امریکہ میں ہندوستان کے سفیر ترنجیت سنگھ سندھو سے ملاقات کر کے ملک کی نئی تعلیمی پالیسی پر تفصیلی تبادلہ خیال کیا اور اس کے امریکہ کے مختلف اعلی تعلیمی اداروں میں اس کی تشہیر کے لئے تعاون طلب کیا۔
ڈاکٹر نشنک نے مسٹر سندھو کو یہاں کہا کہ ہندوستان کا سفارت خانہ امریکہ کے مختلف اعلی تعلیمی اداروں میں قومی تعلیمی پالیسی 2020 کی وسیع پیمانے پر تشہیر کے لئے کئی سیمینار / ویبنار / کانفرنسوں / ورکشاپس وغیرہ کے انعقاد کی کوشش کرسکتا ہے۔ اس طرح کے اہتمام ہندوستانی قونصل خانے کی جانب سے بھی کئے جا سکتے ہیں۔
امریکی طلبا کو ہندوستان کی طرف راغب کرنے کے طریقے کی تلاش
انہوں نے مسٹر سندھو سے امریکہ کے ہندوستانی قونصل خانوں سے مشورہ کر کے مختلف فریقین سے یہ معلوم کرنے پر زور دیا کہ ہندوستان میں اپنے کیمپس کھولنے کے لئے امریکی یونیورسٹیوں کی کیا توقعات ہیں، جس سے اسٹڈی ان انڈیا اسکیم کے تحت امریکی طلباء کو ہندوستان میں متوجہ کرنے کے طریقے تلاش کئے جا سکیں۔
مرکزی وزیر نے سفیر کو یہ بھی بتایا کہ رابطے کے تحت امریکہ کی طرف سے مشترکہ تحقیقاتی تجاویز (74.80 کروڑ) کی زیادہ سے زیادہ تعداد کو منظور کیا گیا تھا۔ انہوں نے کہا ’’مجھے امید ہے کہ امریکہ میں ہندوستان کا سفارت خانہ اس اسکیم کے فروغ میں اہم کردار ادا کرے گا‘‘۔
انہوں نے امریکہ میں ہندوستان کے سفارت خانہ کے ذریعہ جاری تعلیمی سرگرمیوں پر خوشی کا اظہار کرتے ہوئے کہا ’’میں چاہتا ہوں کہ وہاں پڑھنے والے ہندوستانی طلباء کی اضافی دیکھ بھال کی جائے اور یہ بھی امید ہے کہ جب بھی ضرورت پڑے انہیں ہر ممکن امداد اور تعاون فراہم کیا جائے‘‘۔
