پرتگال، اسپین، برطانیہ اور امریکہ کی حکومت اور ان کے مالیاتی اداروں نے کورونا ویکسین کی خریداری کے لئے وینزویلا کے دولت پر کنٹرول کر کے اسے اپنے پاس جمع کرلیا ہے۔
بیونس آئرس: وینزویلا کے صدر نکولس مادورو نے کہا کہ کورونا ویکسین کی خریداری کے تعلق سے ملک کے اثاثوں پر عائد پابندیاں ہٹانے کی اپیل امریکہ اور یوروپی یونین (ای یو) نے مسترد کردی ہے۔
مسٹر مادورو نے یہاں ایک اجلاس سے خطاب کرتے ہوئے کہا کہ پرتگال، اسپین، برطانیہ اور امریکہ کی حکومت اور ان کے مالیاتی اداروں نے کورونا ویکسین کی خریداری کے لئے وینزویلا کے دولت پر کنٹرول کر کے اسے اپنے پاس جمع کرلیا ہے۔ ہم نے ورلڈ ٹریڈ آرگنائزیشن (ڈبلیو ٹی او) کے توسط سے فنڈز پہنچانے کا متبادل مانگا، لیکن اس کے لئے انکار کردیا۔
انہوں نے کہا ’’نائب صدر ڈیلسی روڈریگز نے ان ممالک کے وزرائے خارجہ سے بھی بات چیت کی، لیکن ان کی اپیل بھی مسترد کردی گئی ‘‘۔
واضح رہے کہ مسٹر مادورو کو اقتدار سے بے دخل کرنے کی کوششوں کے امریکہ اور دوسرے مغربی ممالک نے حزب اختلاف کے لیڈر جوان گوائڈو کی حمایت کی ہے اور وینزویلا پر پابندیوں کو برقرار رکھتے ہوئے اس کے اثاثوں کو خود کے پاس جمع کر لیا ہے.
