مرکزی وزیر برائے اقلیتی امور اور حج مختار عباس نقوی نے اعلان کیا کہ حج 2021 کے لیے صرف 43 ہزار درخواستیں موصول ہوئی ہیں۔ حج 2021 کے اخراجات کے تخمینے کی بنیاد پر فیس مقرر کی گئی ہے۔ ممبئی سے 3.5 لاکھ اور گوہاٹی سے چار لاکھ، ادا کرنے ہوں گے۔
ممبئی: آج یہاں مرکزی وزیر برائے اقلیتی امور اور حج مختار عباس نقوی نے اعلان کیا کہ حج 2021 کے لیے صرف 43 ہزار درخواستیں موصول ہوئی ہیں۔ اس کے پیش نظر آخری تاریخ میں 10جنوری تک توسیع کردی گئی ہے۔ جبکہ اس بار ملک میں 21 کے بجائے 10 روانگی مراکز ہوں گے اور محرم بغیر حج کاسفر کرنے والی خواتین کی 500 درخواستیں ملی ہیں اور انہیں بلاقرعہ اندازی سے منظور کرلیا جائے گا۔
انہوں نے مزید کہا کہ حج 2021 کے اخراجات کے تخمینے کی بنیاد پر فیس مقرر کی گئی اور سعودی عرب سے موصولہ اطلاع کی بنیاد پر اس میں کمی کی گئی ہے۔ ممبئی اور احمدآباد سے سفر کرنے والے عازمین حج تقریباً تین لاکھ تیس ہزار روپے ادا کرنے ہوں گے۔ بنگلورو، لکھنئو، دہلی اور حیدرآباد مراکز سے تقریباً ساڑھے تین لاکھ روپے اور کوچین اور سری نگر سے تین لاکھ ساٹھ ہزار روپے، جبکہ کولکاتا سے تین لاکھ ستر ہزار اور گوہاٹی سے سب سے زیادہ چار لاکھ روپے ادا کرنے ہوں گے۔
ون نیشن، ون فئیر (ایک ملک، ایک کرایہ) فی الحال ممکن نہیں
مختار نقوی نے ایک سوال کے جواب میں کہا "ون نیشن، ون فئیر” (ایک ملک، ایک کرایہ) فی الحال ممکن نہیں ہے، لیکن یہ ایک اچھی تجویز ہے، جس پر سبھی ائیر لائنز کو عمل کرناچاہئیے۔ موجودہ کرایہ تخمینہ کی بنیاد پر ہے اور صرف عزیزیہ کیٹگری کے لیے ہے، اس میں کم و بیش ہونے کا امکان ہے۔
انہوں نے کہا کہ وبائی مرض کے پیش نظر عالمی پروٹوکال کے رہنما خطوط پر مستعدی سے عمل کیا جائے گا۔ ابھی سعودی عرب حکومت نے عمرہ کے بارے میں کوئی ہدایت نہیں جاری کی ہے، لیکن عمرہ کے لیے سعودی حکومت نے 18-50 کی عمر والے عازمین عمرہ کو منظوری دی تھی اور اب اس میں 65 سال تک کی توسیع کی جاسکتی ہے۔
