وزیر اعظم نریندر مودی نے سعودی عرب کے شاہ سلمان بن عبد العزیز آل سعود کی دعوت پر دیگر 19 سربراہان حکومت کے ساتھ اس کانفرنس میں شرکت کی، جو کووڈ – 19 کے پیش نظر ورچوئل طور پر منعقد ہورہی ہے۔
نئی دہلی: وزیر اعظم نریندر مودی نے کورونا وائرس کی عالمی وبا کو دوسری عالمی جنگ کے بعد دنیا کو درپیش ہونے والا سب سے بڑا چیلنج قرار دیتے ہوئے جی- 20 سے اس کے خلاف فیصلہ کن اقدام کرنے کا مطالبہ کیا ہے۔ جو صرف اقتصادی باز آبادکاری، روزگار یا تجارت تک محدود نہ ہو بلکہ کرہ ارض کے تحفظ کوبھی محیط ہو۔
وزیر اعظم نے ہفتہ کے روز سعودی عرب کے زیر اہتمام ہونے والی 15 ویں جی- 20 کانفرنس میں ورچوئل طریقے سے حصہ لیا۔ 21 سے 22 نومبر تک ہونے والی اس کانفرنس سے اپنے خطاب میں کورونا وائرس کے مابعد کی دنیا کے لیے نیا عالمی انڈیکس تیار کرنے کی اپیل کی جن میں سماج کے تمام طبقات کے لیے ٹیکنالوجی کی رسائی، مہارت سازی، نظام حکومت کی شفافیت اور کرہ ارضی کے ساتھ تحفظ کا سلوک کرنے کے چار اہم عناصر شامل ہوں۔ ان اہم عناصر پر جی-20 ایک نئی دنیا کی بنیاد رکھ سکتا ہے۔
وزیر اعظم کی شاہ سلمان کی دعوت پر دیگر 19 سربراہان حکومت کے ساتھ کانفرنس میں شرکت
وزیر اعظم مودی نے سعودی عرب کے شاہ سلمان بن عبد العزیز آل سعود کی دعوت پر دیگر 19 سربراہان حکومت کے ساتھ اس کانفرنس میں شرکت کی، جو کووڈ -19 کے پیش نظر ورچوئل طور پر منعقد ہورہی ہے۔ مسٹر مودی کے علاوہ اس اہم کانفرنس میں امریکی صدر ڈونلڈ ٹرمپ، روسی صدر ولادیمر پوتن اور چینی صدر شی جنپنگ بھی شریک ہورہے ہيں۔
نریندر مودی نے ٹویٹ کرکے کہا، "میں نے جی – 20 رہنماؤں کے ساتھ بہت اچھی گفتگو کی ہے۔ ہم یقینی طور پر دنیا کی سب سے بڑی معیشتوں کی مربوط کوششوں سے اس عالمی وبا کے چنگل سے نکل جائیں گے۔ میں اس ورچوئل کانفرنس کی میزبانی کرنے پر سعودی عرب کو مبارکباد پیش کرتا ہوں”۔
Was honoured to address #G20 partners again on the 2nd day of the Virtual Summit hosted by Saudi Arabia.
Reiterated the importance of reforms in multilateral organizations to ensure better global governance for faster post-COVID recovery.
— Narendra Modi (@narendramodi) November 22, 2020
وزیر اعظم نے کہا، "ہمارے عمل میں شفافیت ہمارے معاشرے کو اجتماعی اور اعتماد کے ساتھ بحران سے لڑنے پر آمادہ کرتی ہے۔ کرہ ارضی کے تحفظ کا احساس ہمیں صحتمند اور اجتماعی طرز زندگی گزارنے کی ترغیب دے گا۔ انہوں نے کہا کہ چونکہ کووڈ-19 کے مابعد ‘کہیں سے بھی کام کرنا’ ایک نیا معمول بن چکا ہے، اس لیے جی – 20 کی ورچوئل سکریٹریٹ بنانے کی تجویز پر بھی غور کیا جائے۔
Speaking at the #G20RiyadhSummit. https://t.co/lCqzRQnKhD
— Narendra Modi (@narendramodi) November 22, 2020
واضح رہے کہ موجودہ جی – 20 کانفرنس میں سربراہان کے ذریعہ اعلامیہ کو منظور کیے جانے کے بعد جی – 20 کی صدارت اٹلی کو سونپی جائے گی۔
