اپوزیشن لیڈر کا کہنا ہے کہ غریب لوگوں کی ایک بڑی تعداد دہلی میں رہتی ہے اور ماسک نہ پہننے پر 2000 روپے کا جرمانہ ان کے لئے بہت زیادہ ہے۔
نئی دہلی: دہلی اسمبلی میں حزب اختلاف کے لیڈر رامویر سنگھ بدھوڑی نے ماسک نہ پہننے پر 2000 روپے جرمانے کو غریب مخالف قرار دیتے ہوئے اسے فوری طور پر واپس لینے کا مطالبہ کیا ہے۔
مسٹر بدھوڑی نے جمعہ کے روز کہا کہ غریب لوگوں کی ایک بڑی تعداد دہلی میں رہتی ہے اور 2000 روپے جرمانہ ان کے لئے بہت زیادہ ہے۔ انہوں نے کیجریوال حکومت سے اپیل کی کہ وہ پوری دہلی میں مفت ماسک کی تقسیم کو یقینی بنائے اور لوگوں کو کورونا وائرس سے بھی آگاہ کرے۔ جب تک کہ اس عالمی وبا کو روکنے کے لئے کوئی ویکسین یا دوائی موجود نہیں ہوجاتی، اس سے بچنا ہی اس کو روکنے کا ایک واحد راستہ ہے۔
اپوزیشن لیڈر نے دہلی میں کورونا وائرس کے خلاف دہلی پردیش بھارتیہ جنتا پارٹی کی آگاہی مہم کے تحت مفت ماسک تقسیم پروگرام میں لوگوں کو مفت ماسک تقسیم کیا۔ یہ پروگرام بدر پور اسمبلی حلقہ کے موڈلبند اگروال مارکیٹ میں میں منعقد کیا گيا تھا۔
