امیٹھی بلدیاتی انتخابات کے ابتدائی رجحانات میں ہی بی جے پی نے سبقت حاصل کرلی تھی جو کہ حقیقی نتیجے میں تبدیل ہوگیا
امیٹھی: گاندھی کنبہ کا رسوخ والا ضلع سمجھے جانے والے امیٹھی میں بلدیاتی انتخابات میں کانگریس نے نگر پالیکا کی ایک سیٹ پر کامیابی درج کر کے لمبے وقت کے بعد واپسی کی ہے۔ وہیں بی جے پی نے تین سیٹوں پر جیت درج کی ہے جبکہ سماج وادی پارٹی (ایس پی) اپنی موجودہ سیٹ ہار گئی۔
امیٹھی بلدیاتی انتخابات کے ابتدائی رجحانات میں ہی بی جے پی نے سبقت حاصل کرلی تھی جو کہ حقیقی نتیجے میں تبدیل ہوگیا۔ 4 بلدیاتی نششتوں والے ضلع امیٹھی میں بی جے پی دو نگر پنچایت اور ایک نگر پالیکا پر اپنا قبضہ کیا ہے۔ وہیں کانگریس نے لمبے وقفے کے بعد جائس نگر پالیکا سیٹ پر جیت درج کر کے واپسی کا اشارہ دیا ہے۔ اس الیکشن میں سماج وادی پارٹی کو اپنی گوری گنج سیٹ سے ہاتھ دھونا پڑا۔
نگر پنچایت امیٹھی سے بی جے پی امیدوار انجو کسودھان نے جیت درج کی ہے۔ انہوں نے یہاں سے عام آدمی پارٹی امیدوار رینا جیسوال کو شکست دی ہے۔ جبکہ نگر پالیکا گوری گنج سیٹ پر بی جے پی امیدوار نے سماج وادی پارٹی (ایس پی) سے چھین لیا۔ سماج وادی پارٹی نے تارا دیوی کو میدان میں اتارا تھا۔ جبکہ بی جے پی سے رشمی سنگھ انتخابی میدان میں تھیں۔ رشمی سنگھ کو 7105 جبکہ ایس پی امیدوار کو 4988 ووٹ موصول ہوئے۔
وہیں نگر پالیکا جائس میں ایک دہائی کے بعد کانگریس نے دوبارہ واپسی کی ہے۔ اس سیٹ پر بی جے پی کا قبضہ تھا۔ اس بار کانگریس نے منیشا چوہان کو اپنا امیدوار بنایا تھا۔ کانگریس امیدوار کو 10132 ووٹ ملے جبکہ بی جے پی کے موجودہ چیئرمین مہیش سونکر کی بیوی بینا سونکر کو6552ووٹوں پر ہی اکتفا کرنا پڑا۔ جبکہ نگر پنچایت مسافر خانہ میں بی جے پی امیدوار برجیش گپتا نے آزاد امیدوار فیروز کو شکست دی ہے۔
