میڈیا رپورٹ کے مطابق مسٹر بائیڈن نے یہ اظہار خیال وہائٹ ہاؤس میں اردن کے شاہ عبداللہ حسین دوم سے ملاقات کے دوران کیا
واشنگٹن: امریکی صدر جو بائیڈن نے یروشلم میں واقع مسجد اقصیٰ کمپلیکس کی قانونی حیثیت برقرار رکھنے کی حمایت کا اظہار کیا ہے۔
میڈیا رپورٹ کے مطابق مسٹر بائیڈن نے یہ اظہار خیال وہائٹ ہاؤس میں اردن کے شاہ عبداللہ حسین دوم سے ملاقات کے دوران کیا۔
وہائٹ ہاؤس کی طرف سے جاری کردہ بیان کے مطابق، مسٹر بائیڈن اور شاہ حسین نے امریکہ اور اردن کے درمیان قریبی، دوستانہ تعلقات کا اظہار کیا۔ اس موقع پر دونوں رہنماؤں نے عراق کے وزیر اعظم محمد السودانی سے بھی فون پر بات کی۔
ملاقات میں مسٹر بائیڈن نے مسجد اقصیٰ کے گرد بڑھتی ہوئی کشیدگی کا ذکر کرتے ہوئے اس کی تاریخی اور قانونی حیثیت کو برقرار رکھنے کی اہم ضرورت پر زور دیا۔ انہوں نے اسرائیل-فلسطینی تنازعہ کے تناظر میں "دو ریاستی حل کی حمایت” سے متعلق اپنے ملک کے موقف کا اعادہ کیا۔ اور مشرق وسطیٰ میں استحکام کے لیے پرزور طور پر کردار ادا کرنے پر شاہ حسین کا شکریہ ادا کیا۔
وہائٹ ہاؤس نے کہا کہ مسٹر بائیڈن نے مسٹر السودانی سے بات کی اور عراق کی خودمختاری اور آزادی کو مضبوط بنانے کی کوششوں کی تعریف کی۔ انہوں نے عراق کے اقتصادی ایجنڈے اور معیشت کی بھی تعریف کی۔ دونوں لیڈروں نے دہشت گرد تنظیم اسلامک اسٹیٹ (آئی ایس) کو علاقائی اور بین الاقوامی سلامتی کے لیے خطرہ بننے سے روکنے کے اپنے عزم کا اعادہ کیا۔
