مودی حکومت میں غریب غریب تر ہوتا جا رہا ہے اور امیر امیر تر ہوتے جارہے ہیں
ممبئی: مہاراشٹر کانگریس نے منگل کو دعویٰ کیا کہ مرکز میں نریندر مودی کی قیادت والی بھارتیہ جنتا پارٹی کی حکومت گزشتہ نو برسوں میں تمام محاذوں پر ناکام رہی ہے۔
کانگریس کے ترجمان اتل لونڈے نے کہا کہ ‘آکسفیم’ کی رپورٹ سے یہ واضح ہے کہ ملک کے غریب عوام مودی حکومت کی غلط معاشی پالیسیوں کی بھاری قیمت چکا رہے ہیں اور امیر امیر تر ہوتے جارہے ہیں۔ ملک کی 40 فیصد دولت صرف ایک فیصد کے پاس ہے جبکہ 50 فیصد لوگوں کے پاس صرف تین فیصد ہے۔
انہوں نے الزام لگایا کہ یہ اعداد و شمار ثابت کرتے ہیں کہ مودی حکومت ملک میں معاشی عدم مساوات کو دور کرنے میں ناکام رہی ہے۔ انہوں نے کہا کہ مودی حکومت نے عوام کے مفاد کے لیے پالیسیوں کو نافذ کیے بغیر سرمایہ داروں کے مفادات کو پروان چڑھایا ہے۔
اڈانی کی دولت میں ایک سال میں 46 فیصد اضافہ
انہوں نے کہا کہ ہندوستان میں گزشتہ ایک سال میں ارب پتیوں کی تعداد 102 سے بڑھ کر 166 ہو گئی ہے، اس کے برعکس غریب بنیادی ضروریات بھی پوری کرنے سے قاصر ہیں۔ نریندر مودی کے صنعتکار دوست گوتم اڈانی کی دولت میں ایک سال 2022 میں 46 فیصد اضافہ ہوا ہے۔
ترجمان نے کہا کہ ملک کے غریب اور متوسط طبقے پر امیروں سے زیادہ ٹیکس لگایا جاتا ہے۔ ایک رپورٹ کے مطابق ملک کے کل جی ایس ٹی کا تقریباً 64 فیصد نیچے کے 50 فیصد طبقے سے آتا ہے جبکہ صرف چار فیصد اوپر والے 10 فیصد سے آتا ہے۔
مہنگائی کی شرح میں اضافہ
انہوں نے کہا کہ مودی حکومت میں غریب غریب تر ہوتا جا رہا ہے۔ مودی حکومت کہہ رہی ہے کہ وہ ملک کے 80 کروڑ لوگوں کو راشن پر مفت اناج دے رہی ہے، یہ فخر کی بات نہیں، بدقسمتی کی بات ہے۔ مودی حکومت مہنگائی اور بے روزگاری پر قابو پانے میں ناکام رہی ہے اور لوگوں کی آمدنی میں اتنا اضافہ نہیں ہوا جتنا مہنگائی کی شرح میں اضافہ ہوا ہے۔
انہوں نے کہا، ”راہل گاندھی کی قیادت میں کنیا کماری سے کشمیر تک 3500 کلومیٹر کی پیدل یاترا ملک میں مہنگائی، بے روزگاری، کسانوں اور محنت کش لوگوں کے مسائل پر بھی بات کر رہی ہے۔ اس یاترا میں سماجی اور معاشی عدم مساوات کا مسئلہ بھی ایک اہم مسئلہ ہے۔ انہوں نے کہا کہ بی جے پی کی بنیادی تنظیم راشٹریہ سویم سیوک سنگھ نے بھی ملک میں بڑھتے ہوئے سماجی اور اقتصادی تفاوت پر تشویش کا اظہار کیا تھا، لیکن مودی حکومت نے اس سے کوئی سبق نہیں لیا ہے۔
