انڈونیشیا کے نائب وزیر اعظم محمد محفوظ ایم ڈی وزیر اعظم نریندر مودی سے بھی ملاقات کرکے دونوں ملکوں کے باہمی تعلقات کو فروغ دینے کے سلسلے میں تبادلہ خیال کریں گے
نئی دہلی: انڈونیشیا کے ایک اعلی سطحی وفد کے نئی دہلی کے دورے کے دوران ہندوستانی علما اور انڈونیشیائی وفد میں شامل علما کے درمیان کل یہاں انڈیا اسلامک کلچرل سینٹر میں مذاکرات کا اہتمام کیا گیا ہے، جس کا مقصد دونوں ملکوں کے عوام کے درمیان بین الاقوامی سماجی تانے بانے کو مزید مضبوط کرنا ہے۔
اسلامک کلچرل سینٹر کے صدر سراج الدین قریشی نے آج یہاں ذرائع ابلاغ سے ملاقات کے دوران مذاکرات کی تفصیلات بتاتے ہوئے کہا کہ انڈونیشیائی وفد کے سربراہ نائب وزیر اعظم ڈاکٹر محمد محفوظ ایم ڈی مذاکرات میں شرکت کریں گے اور وفد میں شامل انڈونیشیائی علما بھی شرکت کریں گے۔
انہوں نے بتایا کہ قومی سلامتی کے مشیر (این ایس اے) اجیت ڈوبھال بھی کل منعقد ہونے والے اس پروگرام میں شرکت کریں گے۔ ان کے علاوہ ہندوستان کی سرکردہ مسلم تنظیموں کے اہم علما بھی مذکرات میں شامل ہوکر دونوں ملکوں کے قومی اور ملی مسائل پر تبادلہ خیال کریں گے۔
انڈونیشیا میں آج بھی سنسکرت زبان بولی جاتی ہے
مسٹر سراج الدین قریشی نے بتایا کہ ہندوستان اور انڈونیشیا کے رہن سہن، کھان پان اور کلچر میں کافی یکسانیت ہے۔ یہی وجہ ہے دونوں ممالک ایک دوسرے کے کافی قریب ہیں۔ انہوں نے بتایا کہ مسلم ملک ہونے کے باوجود انڈونیشیا میں آج بھی سنسکرت زبان بولی جاتی ہے اور وہاں کے ہوائی اڈوں، سڑکوں یہاں تک کہ گھروں میں آج بھی مورتیاں نصب ہیں، جن کے تقدس، عظمت اور احترام کو وہاں کے عوام نے آج بھی برقرار رکھا ہے۔
مسٹر قریشی نے بتایا کہ انڈونیشیا میں منعقدہ جی 20 کی میٹنگ میں وزیراعظم نریندر مودی نے شرکت کی تھی، جہاں سے انہوں نے دہشت گردی کے خلاف پرزور آواز بلند کی تھی اور انہیں اس پر بھرپور تائید ملی تھی۔ انہوں نے بتایا کہ چونکہ مذہبی علما زمین سے جڑے ہوتے ہیں اور عوام سے بہت قریب ہوتے ہیں اسی لئے علما کے درمیان مذاکرات اور گفتگو سے دونوں ملکوں کے عوام کے درمیان اچھا پیغام جائے گا۔
انڈیا اسلاملک کلچرل سینٹر کے صدر نے کہا کہ نائب وزیر اعظم محمد محفوظ ایم ڈی وزیر اعظم نریندر مودی سے بھی ملاقات کرکے دونوں ملکوں کے باہمی تعلقات کو فروغ دینے کے سلسلے میں تبادلہ خیال کریں گے۔
ملک میں کچھ سیاسی پارٹیوں کے بعض لیڈروں کی طرف سے الیلکشن کے دنوں میں بار بار دیے جانے والے نفرت انگیز بیان کے بارے میں سوال کئے جانے پر مسٹر قریشی نے کہا کہ کچھ لوگ سیاسی فائدے کے لئے اس طرح کی حرکتیں کرتے ہیں جنہیں نظرانداز کئے جانے کی ضرورت ہے۔
