مدھیہ پردیش کی خاتون وزیر ثقافت اوشا ٹھاکر نے کہا کہ وہ تمام مدارس جن کو مدرسہ بورڈ کی طرف سے اجازت نہیں دی گئی ہے، اور جنہوں نے ڈسٹرکٹ ایجوکیشن آفیسر سے سفارش نہیں لی ہے، ان مدارس کی جانچ ہونی چاہئے
کھنڈوا: مدھیہ پردیش کی خاتون وزیر ثقافت اوشا ٹھاکر نے آج کہا کہ مدرسہ بورڈ کی اجازت کے بغیر چلنے والے مدارس کی جانچ ہونی چاہئے۔
محترمہ ٹھاکر کھنڈوا کی میئر امرتا یادو کی تقریب حلف برداری میں شرکت کے لیے یہاں آئی تھیں۔ یہ بات انہوں نے تقریب حلف برداری کے بعد صحافیوں سے گفتگو میں کہی۔ انہوں نے کہا کہ وہ تمام مدارس جن کو مدرسہ بورڈ کی طرف سے اجازت نہیں دی گئی ہے، اور جنہوں نے ڈسٹرکٹ ایجوکیشن آفیسر سے سفارش نہیں لی ہے، ان کی چھان بین کی جانی چاہئے۔ ایسے ہر مدرسہ کو بند کر دینا چاہیے کیونکہ یہ غیر قانونی مدارس کیسے چلیں گے اس کی ذمہ داری کوئی اور نہیں لے سکتا۔
وزیر ثقافت نے دعویٰ کیا کہ چلڈرن کمیشن کے کچھ ارکان نے اچانک معائنہ کیا تو انہیں پتہ چلا کہ ان غیر قانونی مدارس میں 30-40 چھوٹے بچے ہیں۔ وہاں بچوں کے رہنے کے لیے صحت مند ماحول نہیں، کھانے پینے کا کوئی مناسب انتظام نہیں۔ بچے قوم کا سرمایہ ہیں، قوم کا ورثہ ہیں، ان کی حفاظت ہم سب کی ذمہ داری ہے۔
