پارٹی ہیڈکوارٹر سے جاری ایک بیان میں ترجمان مالویندر سنگھ کانگ نے کہا کہ پارٹی پنجاب کے تاریخی تعلیمی اداروں پر قبضہ کرنے کی نریندر مودی حکومت کی سوچ کے خلاف سڑک سے پارلیمنٹ تک لڑے گی
چنڈی گڑھ: عام آدمی پارٹی (اے اے پی) نے اتوار کو کہا کہ بھگونت مان کی حکومت پنجاب یونیورسٹی کو کسی بھی قیمت پر ہڑپنے کی اجازت نہیں دے گی۔
پارٹی ہیڈکوارٹر سے جاری ایک بیان میں ترجمان مالویندر سنگھ کانگ نے کہا کہ پارٹی پنجاب کے تاریخی تعلیمی اداروں پر قبضہ کرنے کی نریندر مودی حکومت کی سوچ کے خلاف سڑک سے پارلیمنٹ تک لڑے گی۔
انہوں نے مرکزی حکومت کی جانب سے پنجاب یونیورسٹی کو پنجاب سے چھیننے کی کوششوں کی شدید مذمت کرتے ہوئے کہا کہ یونیورسٹی پر پنجاب ریاست کا آئینی، جذباتی اور تاریخی حق ہے۔
مسٹر کانگ نے کہا کہ پنجاب یونیورسٹی عظیم پنجاب کا مشترکہ ورثہ ہے اور اس ادارے نے عالمی سطح پر نام کمایا ہے۔ ملک کی تقسیم کے بعد پنجاب کی اس وراثت کو برقرار رکھتے ہوئے اسے پہلے شملہ اور پھر پنجاب کے دارالحکومت چنڈی گڑھ میں قائم کیا گیا۔ لہٰذا پنجاب یونیورسٹی پر صرف اور صرف پنجاب کا حق ہے اور کوئی بھی مرکزی حکومت پنجاب سے یہ ورثہ نہیں چھین سکتی۔
پنجاب یونیورسٹی پر اب مودی حکومت قبضہ کرنا چاہتی ہے
بھارتیہ جنتا پارٹی، کانگریس اور شرومنی اکالی دل پر پنجاب کے حقوق پر ڈاکہ ڈالنے، وراثت کو برباد کرنے کا الزام لگاتے ہوئے انہوں نے کہا کہ پنجاب پر طویل عرصے تک حکومت کرنے والی ان جماعتوں نے ریاست کی تمام یونیورسٹیوں کو برباد کر دیا ہے۔ انہوں نے الزام لگایا کہ جان بوجھ کر مالی طور پر کمزور کی گئی پنجاب یونیورسٹی پر اب مودی حکومت ایک سازش کے تحت قبضہ کرنا چاہتی ہے۔
واضح رہے کہ پنجاب یونیورسٹی کی سینٹرلائزیشن کی کوششوں کے خلاف 9 جون کو دس طلبہ تنظیموں نے ریلی نکالی تھی اور اس دوران پنجاب پولیس نے طلبہ پر لاٹھی چارج کیا تھا۔ پنجاب اسٹوڈنٹس یونین (للکار) کے طلباء رہنماؤں نے آج سوشل میڈیا پر ایک ویڈیو پیغام جاری کرتے ہوئے مان حکومت پر الزام عائد کیا کہ وہ اس مسئلے پر لاعلمی کا مظاہرہ کر رہی ہے اور پوری ریاست کے طلباء سمیت سماج کے مختلف طبقوں سے یونیورسٹی کو بچانے کی جنگ لڑنے کے لئے ایک ساتھ آنے کی اپیل کی۔
