راجستھان بورڈ آف سیکنڈری ایجوکیشن نے سکینڈری امتحان 2021 کے نتائج کا اعلان کردیا ہے۔ نتائج میں 99.56 فیصد طلبا کو کامیاب قرار دیا گیا ہے۔
اجمیر: راجستھان بورڈ آف سیکنڈری ایجوکیشن نے سکینڈری امتحان 2021 کے نتائج کا اعلان کردیا ہے۔ نتائج میں 99.56 فیصد طلبا کو کامیاب قرار دیا گیا ہے۔
اجمیر واقع بورڈ کے ہیڈکوارٹر پر چیئرمین ڈاکٹر ڈی پی جارولی نے بٹن دبا کر امتحان کے نتائج جاری کئے۔ دسویں بورڈ امتحان میں بیٹھے 12 لاکھ 14 ہزار 512 طالب علم رجسٹرڈ کئے گئے۔
حکومت کے ذریعہ کورونا دورمیں بچوں کا سال خراب نہ ہو اس کے پیش نظر امتحان میں بیٹھنے والے بچوں کو آٹھویں اور نویں کلاس کے حاصل نمبرات کی بنیاد پر تیارکئے فارمولے کو اختیار کرتے ہوئے پاس کیا گیا۔ آج جاری نتائج میں بھی طالبات نے بازی ماری، ان کا کل فیصد 99.62 رہا۔ جبکہ طلبا کا مجموعی نتیجہ 99.51 فیصد رہا۔ طلبا میں ایک کے سپلیمنٹری بھی آئی ہے۔
چیئرمین ڈاکٹر جارولی نے دسویں کے علاوہ سیکنڈری پروفیشنل ایگزامنیشن، پرویشکا اور سینئر اپادھیائے امتحان کے نتائج بھی جاری کئے۔ بورڈ کے سکریٹری اروند کمار سینگوا نے بتایا کہ تمام نتائج بورڈ کی آفیشل ویب سائٹ پر دستیاب ہیں۔
